عيادتك عملت تحليل قبل كده؟

حضرتك عمرك ما هتكتب علاج قبل ما تشوف التحاليل. بس أغلب العيادات بتعمل العكس في التسويق: الحجوزات تقل، فتزوّد ميزانية الإعلانات على طول من غير ما تعرف السبب. والنتيجة رسايل أكتر… وحجوزات زي ما هي.

المشكلة غالبًا مش في عدد المرضى اللي بيوصلوا. المشكلة في اللي بيحصل بعد ما المريض يبعت الرسالة. ودي 4 أرقام تقدر تقيسها بنفسك النهارده، زي ورقة تحليل لعيادتك.

1. زمن الرد على الرسالة

أول رقم وأخطرهم. دراسة James Oldroyd وزمايله المنشورة في Harvard Business Review سنة 2011 حلّلت 1.25 مليون استفسار من 42 شركة، ولقت إن اللي بيرد خلال ساعة فرصته إنه يوصل لمحادثة جادة مع العميل حوالي 7 أضعاف اللي بيرد بعد ساعة أو أكتر. والمريض اللي بيبعت لعيادتك غالبًا باعت لعيادتين تلاتة في نفس الوقت، واللي بيرد الأول بياخد الحجز.

تقيسه إزاي: ابعت رسالة لعيادتك من رقم غريب في وقت الذروة، واحسب الوقت لحد أول رد. الهدف اللي بنشتغل عليه مع الدكاترة: أقل من 5 دقايق.

2. متابعة اللي ماحجزش

أغلب المرضى مش بيحجزوا من أول رسالة. بيسألوا ويفكروا ويقارنوا. لو محدش رجع لهم، الحجز بيروح للي تابع. في عيادات كتير الرقم ده صفر: اللي ماحجزش بيتنسي.

تقيسه إزاي: خد آخر 20 حد سألوا ومحجزوش، وشوف كام واحد فيهم حد كلّمه تاني. الهدف: 3 متابعات مدروسة على أيام مختلفة.

3. الرد بالسعر بس

سؤال «الكشف بكام؟» مش اعتراض، ده اهتمام. لو الرد كان رقم وبس، المريض هيقارن بالأرخص ويمشي. الرد الصح بيعرّف بالدكتور، ويسأل عن الحالة، ويوضّح للمريض هياخد إيه، وبعدين يقول السعر ويعرض ميعاد.

تقيسه إزاي: اقرا آخر 10 ردود على سؤال السعر. كام واحد فيهم كان رقم من غير أي كلمة تانية؟

4. نسبة الحجز من الرسايل

ده الرقم اللي بيلخّص التلاتة اللي فاتوا: عدد الحجوزات ÷ عدد الرسايل. لو الرسايل كتير والنسبة قليلة، يبقى زيادة الإعلانات هتزوّد الصرف مش الحجوزات. المشكلة في الرد والمتابعة، مش في الإعلان.

تقيسه إزاي: عدّ رسايل الأسبوع اللي فات، وعدّ الحجوزات اللي جت منها. ولو مش بتسجّل مصدر كل حجز، دي أول حاجة تبدأ بيها.

تقرا النتيجة إزاي؟

لو رقم واحد بس بعيد عن الهدف، صلّحه الأول قبل أي جنيه زيادة على الإعلانات. ولو الأربعة بعاد عن الهدف، يبقى العيادة محتاجة سيستم كامل: محتوى يقنع، وإعلان للجمهور الصح، وكول سنتر بيرد في دقايق ويتابع، وأرقام تشوفها قدامك.

ده بالظبط اللي بنعمله في الكشف المجاني: بنحلّل صفحاتك وإعلاناتك وطريقة الرد، ونقولك المرضى بيضيعوا منك فين بالأرقام.