ميزانية إعلانات عيادتك: بتترش ولا بتتحقن؟

دكاترة كتير بيقولوا نفس الجملة: «صرفت على الإعلانات كتير… ومجاش حجز». وغالبًا المشكلة مش في حجم الميزانية. المشكلة في طريقة صرفها.

تخيّل حضرتك ميزانية 50,000 جنيه. ممكن تترش على أي حد يشوف الإعلان، وممكن تتحقن في المكان اللي بيجيب مرضى بجد. الفرق بين الطريقتين هو الفرق بين فلوس ضايعة وحجوزات.

الرش: لما الميزانية بتتوزع على أي حد

الرش بيحصل لما الإعلان بيتعمل مرة واحدة، بجمهور واسع، ويفضل شغال بنفس الشكل لحد ما الميزانية تخلص. مفيش اختبار، ومفيش حد بيبص على الأرقام كل يوم. النتيجة: ناس بعيدة عن العيادة، أو مش محتاجة التخصص، أو بتسأل وخلاص… والفلوس بتروح عليهم.

الحقنة: 4 خطوات قبل ما الفلوس الكبيرة تتصرف

1. نحدد مين. قبل أي جنيه: المنطقة بأسماء الأحياء اللي حوالين العيادة (مش دايرة على الخريطة)، والسن والنوع المناسبين للتخصص، والاهتمامات والسلوك. كل فلتر بيشيل ناس عمرهم ما هيحجزوا.

2. نختبر. بدل إعلان واحد، بنطلّع كذا إعلان بزوايا مختلفة (فيديو للدكتور، حالة، رأي مريض)، وكل واحد بياخد ميزانية صغيرة لفترة قصيرة.

3. نختار الأقوى. الأرقام هي اللي بتقرر مش الإحساس: كام محادثة جت، وبتكلفة كام، وكام واحد منهم كمّل في الكلام. الإعلان الضعيف بيتوقف فورًا، فالميزانية ماتضيعش عليه.

4. نحقن الميزانية. بعد ما إعلان يثبت إنه بيجيب، الميزانية تروح عليه هو. ومع الوقت بنكرر الاختبار بإعلانات جديدة، عشان الإعلان الكسبان بيتعب مع الوقت.

أرقام حقيقية

من 4 حملات شغالة دلوقتي بنديرها لدكاترة، والأرقام من مدير إعلانات ميتا مباشرة: 2,912 محادثة واتساب جديدة، بمصروف 39,398 جنيه، يعني متوسط حوالي 13.5 جنيه للمحادثة. وأقل حملة فيهم وصلت تكلفة المحادثة فيها 8.67 جنيه.

المحادثة مش حجز لوحدها طبعًا. عشان كده الخطوة اللي بعدها مهمة زيها بالظبط: الرد السريع والمتابعة، وده دور الكول سنتر.

تعرف ميزانيتك بتترش ولا بتتحقن إزاي؟

اسأل نفسك 3 أسئلة: هل في أكتر من إعلان شغال بيتقارنوا ببعض؟ هل في حد بيوقف الإعلان الضعيف خلال أيام؟ وهل حضرتك عارف تكلفة المحادثة وتكلفة الحجز؟ لو الإجابة «لأ» على أي واحد منهم، يبقى جزء من الميزانية بيترش. وممكن تقرا كمان أشهر 5 أسباب بتخلّي الإعلانات ماتجيبش مرضى.

ولو عايز نراجع إعلاناتك ونقولك الفلوس بتروح فين بالأرقام، ده جزء من الاستشارة المجانية.